საქართველოს ყოფილი პრემიერ-მინისტრი გიორგი კვირიკაშვილი დუმილს არღვევს. ყოფილი პრემიერი “ქართული ოცნების“ ლიდერს, ბიძინა ივანიშვილს საჯაროდ აკრიტიკებს და უპირისპირდება. კვირიკაშვილი ტელეკომპანია “მთავარ არხთან“ ინტერვიუში ქვეყანაში არსებული პრობლემების შესახებ ამახვილებს ყურადღებას და აღნიშნულზე პასუხისმგებლობას ბიძინა ივანიშვილს აკისრებს. ყოფილი პრემიერი ინტერვიუს პოლიტიკაში შესაძლო დაბრუნებით იწყებს და აცხადებს, რომ ამ ეტაპზე “თანამდებობისთვის ბრძოლას არ აპირებს“.“აქტიურ პოლიტიკაში დაბრუნებას არ ვაპირებ. არც ერთი პოლიტიკური თანამდებობისთვის ბრძოლას არ ვაპირებ, მაგრამ როგორც ამ ქვეყნის მოქალაქესა და ყოფილ პრემიერ-მინისტრს, ჩემი აქტიური მოქალაქეობრივი და თუ გნებავთ, პოლიტიკური პოზიცია მექნება. რაც გამოიხატება იმაში, რომ რაღაცა შეიძლება მომწონდეს, რაღაცა შეიძლება არ მომწონდეს. მაგალითად, 20 ივნისს, რაც მოხდა ძალიან არ მომეწონა და გავაკეთე კიდევაც ამის შესახებ განცხადება. ასეთი რაღაცა, შესაძლოა, კიდევ მოხდეს მომავლში და არასოდეს ჩუმად ყოფნას არ ვაპირებ“,- განაცხადა კვირიკაშვილმა.გიორგი კვირიკაშვილის თქმით, თანამდებობა იმიტომ არ დაუტოვებია და პოლიტიკაში იმიტომ არ ბრუნდება, რომ აშანტაჟებენ. ყოფილი პრემიერის თქმით, “ის დაშანტაჟებულ კაცს არ ჰგავს“.