აშშ-ის სახელმწიფო დეპარტამენტის სპიკერი ნედ პრაისი გამოეხმაურა საქართველოში 5 და 6 ივლისს განვითარებულ მოვლენებს და ასევე უპასუხა ჟურნალისტის კითხვას, განიხილავს თუ არა ვაშინგტონი საქართველოს ხელისუფლების რიგი წარმომადგენლებისთვის პერსონალური სანქციების დაწესების შესაძლებლობას.მან მწუხარება გამოხატა ტვ პირველი ოპერატორის, ლექსო ლაშქარავას გარდაცვალების გამო და სამძიმარი გამოუცხადა ლაშქარავას კოლეგებსა და ოჯახის წევრებს.“ჩვენ ყურადღებით მივყვებით მის გარდაცვალებასთან დაკავშირებულ ინფორმაციას. მოგიწოდებთ სიმშვიდისკენ და იმ ძალადობის დასრულებისაკენ, რომელმაც უკვე შეიწირა ერთი სიცოცხლე”, – განაცხადა პრაისმა.
მისივე თქმით, ჟურნალისტების უსაფრთხოება და დემოკრატიის სიმტკიცე მოითხოვს, რომ ყველა ინდვივიდი, ვინც თავს დაესხა ჟურნალისტებს 5-6 ივლისს, ან ისინი ვინც მოძალადეების უკან იდგნენ, პასუხისგებაში მიეცნენ კანონის შესაბამისად.
“შევახსენებთ საქართველოს ლიდერებს და სამართალდამცველებს მათ პასუხისმგებლობას, დაიცვან ყველას კონსტიტუციური უფლება, შევახსენებთ მათ პასუხისმგებლობას, რომ დაიცვან ჟურნალისტები. მოვუწოდებთ ყველას, მათ შორის მთავრობის წარმომადგენლებს, საჯაროდ დაგმონ ძალადობა, რომელსაც დემოკრატიაში ადგილი არ აქვს”, – განაცხადა ნედ პრაისმა.
მისივე თქმით, აშშ მთელი მსოფლიოს გარშემო ეწინააღმდეგება ძალადობას, დისკრიმინაციასა და სტიგმას, რომელსაც ქვიარ თემის წარმომადგნლები განიცდიან, მათ შორის საქართველოში.
“რაც შეეხება პრემიერ-მინისტრს [ირაკლი ღარიბაშვილი] და მის მომავალს, ეს, რა თქმა უნდა, ქართველი ხალხის გადაწყვეტილებაა”, – განაცხადა პრაისმა.
ამის შემდეგ აშშ-ის სახელმწიფო დეპარტამენტის წარმომადგენელს ჟურნალისტმა ჰკითხა, მისი წყაროების მიხედვით, ვაშინგტონში განიხილება საქართველოს მთაავრობის იმ ოფიციალური პირების მიმართ პერსონალური სანქციების დაწესების საკითხი, ვინც პირდაპირაა პასუხისმგებელი 5 ივლისის ძალადობაზე. ნედ პრაისმა ამ საკითხს ასე უპასუხა.
“ჩვენ გვაქვს რიგი ინსტრუმენტები, ვინც პასუხიმსგებელია ადამიანის უფლებების დარღვევაზე… სანქციები არის ერთ-ერთი მათგანი. როგორც თქვენთვისაა ცნობილი, ჩვენ წინასწარ არ განვიხილავთ სანქციებს, სანამ მას არ დავაწესებთ, მაგრამ სიტუაციას ძალიან ახლოდან ვადევნებთ თვალს”, – განაცხადა პრაისმა და დასძინა, რომ აშშ ელის, დამნაშავე პირები პასუხს აგებენ ძალადობის გამო, ხოლო მომხდარს ყველა პარტია დაგმობს.